Битва на Калке. 1223 г.

Типографская летопись. М., 2000. С. 87–91

[С. 87] «О побоищи иже на Калкахъ. В лѣто 6731, по грѣхомъ нашимъ, пріидоша языци незнаемии, при великомъ князи Мстиславѣ Романовиче, внуце Ростиславлѣ Мстиславича, пріидоша бо неслыханіи безбожніи Моавитяне, рекоміи Татарове, ихже добрѣ ясно никтоже съвѣсть, кто суть и откоудоу пріидоша и что языкъ ихъ и которого племене соуть и что вѣра ихъ. Зовуть же ся Татарове, а ины глаголють Таоурмены, а друзіи Печенѣзи, инии же глаголють, яко си суть, о нихже Мефодий, епископъ Паторомскій, свидѣтельствуеть, яко си суть вышли ис пустыня Етровскіа, сущии межи встокомъ и севѣромъ, къ скончанію времяни явитися имъ, ихже загна Гедеонъ, и поплѣнять всю землю отъ встока и до Ефрата и отъ Тигръ до Понтьскаго моря, кроме Ефеопіа. Про сихъ же слышахомъ, яко многи страны поплѣниша: Ясы, Обезы и Косагы, пріидоша же на землю Половецьскоую, [С. 88] и Половцемъ ставшемъ, а Юрьи Кончаковичь бѣ болий всѣхъ Половець, не може стати противу лицю ихъ, но бѣгающу ему, а Половцы, не возмогше же противися имъ, побѣгоша, и мнози избьени быша. И гониша ихъ до рѣкы Днѣпра, а иныхъ загнаша по Дону и в лоукоу моря, и тамо измроша, оубиваеміи гнѣвомъ Божиимъ и пречистыа его Матере. Много бо ти Половци зла сътвориша Роуской земли. Богъ же отмщеніе сътвори надъ безможными Куманы, сынъми Измаиловы: победиша ихъ Татари и инѣхъ языкъ 7, проидоша всю страну Коуманскую и пріидоша близъ Руси. А Котякъ, Половецьскій князь, съ инѣми князми и съ останкомъ Половець прибѣгоша, идеже зовется валъ Половецкій, а Данилъ Кобяковичь и Юрьи Кончаковичь оубиена быста, а ини Половци мнози прибѣгоша в Рускоую землю. Сей же Котякъ бысть тесть князю Мстиславу Мстиславичю Галичьскому. И пріде с поклономъ съ князи Половецкими к зятю князю Мстиславу в Галичь и къ всемъ княземъ Роускымъ и дары принесе многы: кони и вельблуды, боуволы и дѣвкы и одари все князи Роускіа, глаголаша к нимъ сице: „Нашю землю днесь отъяли Татарове, а вашю заоутра возмуть, пришедъ, то побороните насъ; аще ли не поможете намъ, то мы нынѣ иссечени будемъ, а вы на оутрее иссечени будете“. И нача молитися Котякъ зятю своему о пособи. А Мстиславъ нача молитися братии своей, княземъ Русскимъ, река: „Аще мы, братіе, симъ не поможемъ, то предадятся им же, боудеть то болши сила ихъ“. И тако думавше много и яшася пособити Котяню, слушающе же моленіа Половецьскихъ князей. Бывшу же съвѣту всѣхъ князей въ градѣ Киевѣ, створиша сиць совѣтъ: „Лоучшіи бо намъ стрѣтити ихъ на чюжой земли, нежели на своей“. И начаша вои строити, кыйждо свою власть. Тогда бѣ в Киевѣ князь Мстиславъ, сынъ Романовъ Ростиславича, а в Черниговѣ Мстиславъ Святославичь Козельскій, а в Галиче Мстиславъ Мстиславичь. Тии бо бѣяху старѣйшіи в Роусской земли, с ними же князи младии: князь Данило, Романовъ сынъ, Мстиславича, князь Михайло Всеволодичь Черниговьскый, вноукъ Святославль Олговича, князь Всеволодъ, сынъ Мстислава Киевьскаго, и ини князи мнози. Тогда князь великий Половечьскій крестися, Басты. И совокоупиша землю Роускоую всю противу Татаромъ и пріидоша к рецѣ Днѣпру на Зароубъ, ко острову Варяжьскому. Оувѣдаша же Татарове, яко идоутъ князи Роустіи противу имъ, и послаша послы ко княземъ Рускымъ, ркоуще: „Се слышимъ, оже противу насъ идете, послоушавше Половець, а мы вашей земли не заяхомъ, ни городовъ вашихъ, ни селъ, ни на васъ пріидохомъ, но пріидохомъ Богомъ попоущени на холопи наши и на конюси своа, на поганыа Половцы, а вы възмите с нами миръ, зане рати с вами намъ нетъ. А аще побежать к вам Половци, а вы ихъ бейте отъ себе, а товаръ емлите себе, слышахомъ бо, яко много зла и вамъ творятъ, того же дѣля мы ихъ отселе бьемъ“. Князи же Роустіи того не послушаша, но и послы Татарскіа избиша, а сами поидоша противу имъ и, не дошедше Отшелиа, сташа на Днѣпрѣ. И прислаша Татарове дроугыа послы, глаголюще: „Аще есте послоушали Половецъ и послы есте наши избили, а идете противу намъ, то вы поидете, а мы [С. 89] васъ не замали ничимъ, а всѣмъ намъ Богъ“. И отпустиша послы ихъ. Пріиде же тоу вся земля Половецьскаа и вси [и]хъ князи, а ис Киева князь Мстиславъ со всею силою, а Володимеръ Рюриковичь со Смолняны и вси князи Роустіи и вси князи Черниговстии и Смолняне и иніи страны. Тогда же князь Мстиславъ Галичьскій перебродися Днѣпръ въ тысящи вой на сторож[и] Татарскиа и победі а, а останокъ ихъ побеже с воеводою с Гемябѣкомъ. И тоу имъ не бѣ помощи. Погребоша же воеводу своего Гемябѣка живого в землю, хотяще живаго оублюсти, и ту наидоша его; испросивше же Половци, оубиша его. Слышавше то князи Рустіи, поидоша вси вкупе за Днѣпръ на множествѣ лодій, а Галичанѣ и Волынци кыйждо съ своими князми, а Коуряне и Трубчяне и Поутивьлцы пріидоша кыйждо съ своими князи. Пріидоша же и выгонцы Галичьскіе в лодіахъ по Днѣпру и выидоша в море, бѣ бо лодій 1000, и воидоша в рѣкоу Днѣпръ и возвѣдоша порогы и сташа оу рекы Хортици на бродѣ, на протолчьи; бѣ же с ними Домарѣчичь Юрьи и Держикрай Володиславичь. Пришедше вѣсти в станы, яко пришли соуть подсмотрити олядии Русскіа. Слышав же Данилъ Романовичь и всѣдъ на конь гна, и соущи с нимъ конници и ини мнози князи с нимъ гнаша видѣти рати. Онѣм же шедшемъ, Юрьи же имъ сказаша, яко стрѣлцы соуть, инии же молвяху, яко прости людие соуть, пуще и Половець. Юрьи же Домарѣчичь молвяше: „Ратници соуть и добраа воа“. И приехавше, сказаша Мстиславу. Юрьи же все сказа. И рекшимъ молодымъ княземъ: „Мстиславе и другий Мстиславѣ, не стойте, поидемъ противу имъ“! Пріидоша же вси князи рѣкоу Днѣпръ и поидоша на конихъ в поле Половецьское. И оустрѣтоша Татарове полкы Роускіа, стрѣлци же Роустіи победиша ихъ и гнаша в поле далече, сѣкуще ихъ, и взяша скоты ихъ, а стады оутѣкоша, яко всѣмъ воемъ наполнися скота. Оттоудоу же идоша по нихъ 8 дний до рѣкы Калкы. И тоу сретоша сторожеве Татаръстіи, и оудариша на Половцы Русстіи. Сторожеве же бишяся с полкы Роусскыми, и оубьенъ бысть тоу Іоанъ Дмитреевичь и ина два с нимъ. Татаром же отъѣхавшемъ и на прочнѣ рѣце Калцѣ оусретоша Татарове Половецькие полки и Роусскые. Князь же Мстиславъ Мстиславичь повелѣ переити реку Калку Данилови с полкы и инѣмъ полкомъ с нимъ, а самъ по нихъ переиде. И зашедше за рѣкоу за Калку и послаше въ сторожехъ Яроуна с полкы и с Половцы, а сами станомъ сташа ту, а князь Мстиславъ самъ ѣха вборзѣ после. Видѣвше же ему полкы Татарскіа и приехавъ, вооружитися повелѣ вборзѣ, а князь Мстиславу и другому Мстиславоу сѣдящемъ въ стану, а и не вѣдущим того, не повѣда бо имъ Мстиславъ Мстиславичь зависти ради, бѣ бо котора межъ има велика. Сшедшимся полкомъ вмѣсто, Данил же выѣха напередъ и Семенъ Олюевичь и Василко Гавриловичь, и разишяся в полкы Татарския. Василкови же сбодену бывшю, а Данилоу боудену бывшу въ перси, не чюаше же раны, младеньства ради и боуесте, бывши на телеси его, бѣ бо лѣтъ 18, но крѣпокъ бѣ на брань. Избивающю же ему Татары мужестве нѣ, видѣв же то Мстиславъ нѣмый, мнѣвъ, яко Данилъ сбоденъ бысть, и потче и тъй на нихъ, бѣ бо и [С. 90] тъй мужъ крѣпокъ, понеже оужика сый Романоу, отъ племени Володимеря Манамаша, бѣ бо великоу любовь имѣа къ отцоу его, яко по смерти своей власть всю даа князю Данилови.

Татаром же бѣгающимъ, Данилови же избивающю ихъ своимъ полкомъ и Олгови Коурскому крѣпко бьющюся с ними, тогда Яроунъ и ини полцы Половедстіи сстоупишяся с ними, хотяще битися. Пакы же вскоре побегоша Половци и потопташа, бѣжаще, станы Роусскихъ князей, а князи не оуспѣвше ополчитися противу ихъ и смятошяся вси полци Роусстіи, и бысть сѣча зла и люта, грѣхъ ради нашихъ. Роусскымъ полкомъ побѣженомъ бывшимъ, Данил же, видѣвъ, яко крѣпчае брань Татарьскаа належить, обрати конь свой и побеже отъ оустремленіе противныхъ. И вжада воды, пий и почюти рану на телеси своемъ, въ брани же не позна еа, крѣпости ради моужества возраста его, бѣ бо дръзъ и храбръ, и не бѣ ни в чем же емоу зарока. И бысть побѣда на всѣ князи Роускіа, ака же не бывала отъ нача[ла] Роуской земли никогда же. Видѣ же се великый князь Мстиславъ Кыевскій бывшее зло, и не движеся никакоже с мѣста, сталъ бо бѣ на горѣ надъ рѣкою Калкою. Бѣ бо мѣсто каменисто, и тоу оучиниша городъ с колиемъ, и бися с ними изъ города по 3 дни. А ини Татарове поидоша послѣ Роусскыхъ князей, бьюще ихъ и до Днѣпра, а оу города осташа два воеводы, Чегирканъ и Тешоуканъ, на князя Мстислава и на зятя его на Андрѣа i Александра Доубровскаго. Бѣста бо ту два князя со княземъ Мстиславомъ, ту же и Бродници быша старыи и воевода ихъ Плоскиня, и той окаанный цѣлова крестъ ко князю Мстиславу и обѣма князема, яко не избити ихъ, но поусти ихъ на искоупъ, и сългавъ окаанный, предасть ихъ, связавъ, Татаромъ, а городъ взяша, людей же исѣкоша, а князей подклаша под [д]скы и сѣдоша връху ихъ обѣдати, и тако ту скончаша князи животъ свой. А инѣхъ князей, гонячи до Днѣпра, 6 оубиша: князя Святослава Каневскаго, Изяслава Иговорскаго, Святослава Шюмскаго, Мстислава Черниговскаго съ сыномъ, Юрьа Несвѣжскаго, а вои толико десятый пріиде. I Александръ Поповичь тоу убъенъ бысть съ инѣми седмьюдесять храбрыхъ. Князь же Мьстиславъ Мстиславичъ тогда преже всѣхъ перебеже Днѣпръ и перевезся зань, повелѣ ладии сжещи, а иные сѣщи и отринути отъ берега, бояся по себѣ погони отъ Татаръ, а самъ едва оубежа в Галичь, а молоди князи прибежали вмале людей, а князь Володимеръ Рюриковичь прибѣгъ в Киевъ, сѣде на столѣ. Сии же злоба сключися отъ татаръ мѣсяца іюня344 въ 16 день. Татаромъ же победившимъ Роускіа князи, за прегрѣшеніе хрестьянское, и дошедшимъ имъ до Новагорода Святополчьскаго, Русь же не вѣдяху злобы и лсти Татарскія и ненависти на хрестьянъ и схожахоу противу имъ съ кресты, они же избиваху всѣхъ. Милостивый же человѣколюбецъ Богъ, ожидаа покааніа хресть яньскаго, обрати Татары вспять отъ рѣкы Днѣпра на землю восточноую и повоеваша землю Таноготскую и ины страны. Тогда же и Чаногыз, канъ ихъ, оубьенъ бысть. Се же бысть намъ за грѣхы наша, Богъ вложи недооумѣніе в насъ, и погубе множество людий. И бысть вопль и воздаханіе и печаль по всемъ градомъ и по волостемъ; гла[С. 91]голаху же сице, яко единѣхъ Кианъ изгибе тогда 1000345. Егда же почаша князи Роусстіи совокоупляти полкы своя противу безбожныхъ Татаръ, тогда и въ Володимеръ послаша къ князю Юрью Всеволодичю, помощи просяще. Он же посла к нимъ сыновца своего Василка Костянтиновича с Ростовцы и прочими вои. Василко же поиде вскорѣ, но не оуспѣ пріити к нимъ. Но бывшю ему оу Чернигова и слыша зло, сътворшееся над Рускими князьми, и възвратися въспять, съхраненъ Богомъ и силою Креста честнаго. И пріиде въ свой Ростовъ, славя Бога и святую Богородицю. Сихъ же злыхъ Татаръ — Таорменъ не свѣдаемъ, откоудоу быша пришли на насъ и камо ся дѣли опять».

Список первой половины XVI в.